Mund të zbrazen farmacitë dhe supermarketet, por një produkt që do të jetë me tepricë këto ditë do të jenë lajmet për koronavirusin.

Për fat të keq pre e lajmeve të rreme dhe të çuditshme për koronavirusin kanë rënë edhe mjekët dhe infermierët, pa llogaritur “mjekët popullorë” që duket se janë dezhurn 24 orë në facebook jo për të dhënë këshilla, por informacione dhe të rejat më të fundit.
Nëse sot është vështirë të gjesh maska mbrojtëse në farmaci për të siguruar gojën dhe hundët, infektimi më i madh të vjen nga ajo që të lexojnë sytë.

Mund të mos kesh temperaturë, por prap ndjen dhimbje koke apo probleme në frymëmarrje jo nga koronavirusi por nga ankthi që vjen prej informacioneve të pa kontrolluara.

Një lajm i rremë që po qarkullon dhe po shpërndahet me shpejtësi janë disa “këshilla” që herë I referohen spitalit “Gemeli” në Romë e herë UNICEF-it.

Lajmet e Unicefit duhen parë vetëm në faqen zyrtare të Unicef: unicef.org;
Lajmet e Organizatës Botërore të Shëndetësisë duhen parë vetëm në adresën zyrtare: who.int;
Lajmet zyrtare të Instituti të Shëndetit Publik gjenden në ishp.gov.al;
Lajmet zyrtare të ministrisë së shëndetësisë gjenden tek shendetesia.gov.al;
Lajmet për koronavirusin apo këshillat në media ndërkombëtare të besueshem dhe të testuar në krizat edhe më të rënda janë bbc, cnn, the guardian, deutsche welle etj.;

Lajmet që kanë emrin e gazetarit janë më të besueshme se ato anonime. Nëse lexon psh lajme që profesor Tritan Kalo ka thënë, më mirë kontrollo në burim lajmin duke shkuar te faqja e facebook-ut të mjekut të njohur këto ditë nga të gjithë.

Infodemia- epiteti më i ri që ju bashkëngjit medias – mund të bëj po aq dëm në mos më shumë se koronavirusi.

Lajmet për koronavirusin kërkojini te mjekët dhe ekspertet, te autoriteti që ka përgjegjësinë për situatën, dyshoni jo vetëm në çdo titull, por edhe në çdo fjali që nuk ka sens. Si për shembull: po të jetë temperatura 26 gradë virusi nuk jeton. Nëse kjo fjali do të ishte e vërtetë atëherë, trupi i njeriut që ka temperaturë 36 gradë do të ishte vendi i fundit ku virusi do të kërkonte strehë.

Nga përvoja e këtyre dy muajve që nisi në Kinë dhe tani është në shtëpinë tonë, virusi nuk është aq i fortë sa të tjerët, por përhapet me shpejtësi. Shmangia e grumbullimeve, shtrëngimit të duarve e përqafimeve, mbajtja e një distance të shëndetëshme jo vetëm nga njerëzit, por edhe nga lajmet e rreme është receta që mund ta marrë kushdo pa paguar asnjë qindarkë.

Copyright Të gjitha të drejtat e artikujve të publikuar janë të rezervuara dhe i përkasin © MediaLook. Ju mund të përdorini, publikoni ose përktheni artikullin me kushtin që ju të atribuoni dukshëm burimin, të kryeni lidhje hiperlink me faqen dhe mos ta përdorni atë për qëllime komerciale.

LEAVE A REPLY

Please enter your comment!
Please enter your name here