Bashkimi Europian nënvizon se Shqipëria jo vetëm që nuk ka shënuar progres në fushën e lirisë së shprehjes, por gjatë kësaj periudhe janë shtuar sulmet dhe intimidimet ndaj gazetarëve.
Në Progres – Raportin 137 faqesh të përpiluar nga Komisioni Europian, ndërsa flitet për lirinë e shprehjes, evidentohet klima e rëndë e sulmeve verbale por dhe fizike ndaj reporterëve. “Tensionet mes politikanëve dhe gazetarëve janë rritur gjatë periudhës së pandemisë”, – thuhet në dokument, “me një klimë ngjashmërisht intimiduese gjatë fushatës së zgjedhjeve parlamentare”.
Raporti i BE-së ndalet dhe te nevoja për krijimin e një klime të qetë, pa ndërhyrjen e qeverisë në punët e medias, duke ripërsëritur se mekanizmi i vetëm rregullues sa i takon medias online është ai i “vetërregullimit” dhe jo propozimet e të ashtuquajturës “paketë antishpifje”. BE nënvizon se amendimet ligjore të propozuara nga qeveria duhet të rishikohen sipas propozimeve që ka dhënë Komisioni i Venencias në raportin e tij, veçanërisht sa i takon aspekteve të rregullimeve për shpifjen.
Raporti i Komisionit Europian është ndalur edhe te Autoriteti i Medias Audiovizive, në të cilën evidentohet rëndësia e finalizimit të procesit në lidhje me kalimin nga transmetimet analoge në ato numerike në dhjetor të vitit 2020. Gjithashtu në dokument theksohet rëndësia për të plotësuar dhe bërë funksionale AMA-n me miratimin e anëtarëve të tjerë të bordit. “Është jetike”, – thuhet në dokument, – “që zgjedhja e anëtarëve të rinj të mund të garantojë pavarësinë dhe legjitimitetin e autoritetit rregullues”.
Sakaq, në dokument kërkohet gjithashtu forcimi i pavarësisë, rritja e standardeve profesionale dhe qëndrueshmërinë financiare. Apeli vjen në një kohë kur SPAK ka ndaluar ish Drejtorin e Përgjithshëm të Radio Televizionit, Thoma Gëllci, i dyshuar për përfshirje përmes shpërdorimit të detyrës në korrupsion tenderash.
