Bazuar në të dhënat që vetë operatorët televizivë kanë deklaruar në Qendrën Kombëtare të Regjistrimit, MediaLook ka mbledhur dhe publikuar fitimet vjetore neto të TV-ve kombëtare si shoqëri aksionare. Ajo që bie në sy nga grafiku i mësipërm është se TV Klan ka raportuar fitime, veçanërisht në tre vitet e fundit, shkojnë edhe deri në qindra herë më të larta se dy televizionet e tjera, pavarësisht se sipas vëzhgimeve të mediave, tre TV-të e paraqitur në grafik ndajnë tortën kryesorë të të ardhurave nga reklamat. Sipas raportit “Media Ownership Monitor Albania” të publikuar nga Reporterët pa Kufij dhe Birn Albania vetëm për vitin 2016 “më shumë se gjysma e shpenzimeve për reklama i shkojnë tre kompanive të mëdha mediatike Top Channel, TV Klan dhe Media Vizion me vlerë 25.16 milionë USD (20.4 milionë euro). Nga këto, thuhet në të njëjtin raport, Top Channel ka marrë një vlerë prej 12.4 milionë USD më 2016, pasuar nga TV Klan me 9,1 milionë USD dhe Media Vizion me 3.6 milionë USD. Ndërkaq dy televizionet e tjera, në tre vitet e fundit, rezultojnë me fitime vjetore nga 753 mijë - 3.5 milionë lek, ne kufijtë e një biznesit të vogël.