Verifikimi i informacioneve që publikohen në mediat online, por edhe ato tradicionale është një praktikë në zhdukje. Shqetësimi ngrihet në publikimin më të fundit të Institutit të Medias, me titull “Peizazhi i medias online në Shqipëri”, ku është realizuar një anketë me kryeredaktore e gazetarë të afro 120 portaleve, përfshi dhe faqet web të mediave tradicionale.

Në këtë raport sillet si shembull ilustrues sesi një deklaratë e kreut të qeverisë Edi Rama për mbi 28  324 të punësuar, nga periudha maj 2017- korrik 2018, ishte publikuar pa kurrfarë verifikimi në pjesën dërrmuese të mediave vizive, print e online, pavarësisht ftesës së tij ndaj gazetarëve për ta konfirmuar një statistikë të tillë:

Në të vërtetë, ky lajm u riprodhua fjalë për fjalë në shumë media tradicionale dhe online, por verifikimi i gazetarëve për këtë shifër të kryeministrit nuk u krye. Si rregull, deklaratat thjesht botohen, nuk verifikohen dhe kjo gjë ka mpakur rolin e gazetarëve si rojtarë dhe gjithashtu ndikon në saktësinë e informacionit të marrë nga publiku. – thuhet në këtë studim.

Publikimi i Institutit të Medias evidenton se portalet online në Shqipëri rrezikojnë të kthehet thjesht në një “rrip transmisioni” riprodhuese e deklaratave nga rrjetet sociale drejt publikut, shkruar në pak radhë dhe pa i vendosur ato në kontekst. Një shembull ilustrues për këtë ishte dhe raportimi i një deklarate të ministrit Bushati mbi diskutimet për kufirin detar midis Shqipërisë dhe Greqisë.

Në këtë studimi citohet dhe hulumtimi i MediaLook mbi përputhshmërinë e përmbajtjes së deklaratave të Bashkisë Tiranë me lajmet e publikuara në dhjetë ndër mediat print, vizive dhe ato online, që varion nga 47 % deri në 93%. Madje, ky publikim evidenton se kjo problematikë është edhe më e madhe se kaq:

Ndërsa këto të dhëna sasiore tregojnë shtrirjen e fenomenit në terma sasiorë, mbizotërimi i këtyre raportimeve nuk kufizohet vetëm me Bashkinë e Tiranës dhe tregon prirjen e përgjithshme të medias për të ndjekur politikanët, duke dobësuar mbulimin në aspektin e diversitetit të informacionit dhe pikëpamjeve, – thuhet në kërkimin e Institutit të Medias.

Ndërkaq, edhe vetë gazetarët e anketuar nga radhët e mediave tradicionale në versionin e tyre online por dhe ato që operojnë vetëm në linjë evidentojnë si tre ndër problematikat kryesore shkeljen e të drejtës së autorit, mungesën e raportimit cilësor dhe financimin, me respektivisht 53, 47 dhe 36 vota.

Nga ky anketim janë realizuar dhe profilet e medias online. Nga 120 të marra në analizë rezulton se 98 prej tyre ose 81.6% janë me karakter gjeneralist, ndërsa vetëm 18.4% janë media të profilizuara.

Sa i takon numrit të punonjësve, rezulton se 58% e portaleve kanë të punësuar 1-5 vetë, kryesisht gazetarë.

 

 

Copyright Të gjitha të drejtat e artikujve të publikuar janë të rezervuara dhe i përkasin © MediaLook. Ju mund të përdorini, publikoni ose përktheni artikullin me kushtin që ju të atribuoni dukshëm burimin, të kryeni lidhje hiperlink me faqen dhe mos ta përdorni atë për qëllime komerciale.

2 KOMENTE

LINI NJE PERGJIGJE

Ju lutem vendosni komentin tuaj këtu!
Ju lutem vendosni emrin tuaj këtu